𝐆𝐫𝐚𝐳𝐢𝐞, 𝐅𝐫𝐚𝐧𝐜𝐞𝐬𝐜𝐨! 𝟕 𝐒𝐞𝐤𝐫è 𝐤𝐢 𝐤𝐚𝐜𝐡𝐞 𝐧𝐚𝐧 𝐅𝐢𝐧𝐞𝐫𝐚𝐲 𝐏𝐚𝐩 𝐥𝐚 | Alce MK Henry

𝐕𝐫è 𝐠𝐫𝐚𝐧𝐝è 𝐚 𝐜𝐡𝐢𝐭𝐚 𝐧𝐚𝐧 𝐬𝐞𝐧𝐩𝐥𝐢𝐬𝐢𝐭𝐞

Lè yon gwo tèt mouri, fineray li se yon okazyon inik pou raple grandè l. Gen sa ki menm konn antere nan sèkèy k ap friz pou konsève kò yo. Pap Francois te mande 4 fèy planch sèlman. Pa t gen flè ak gwo dekorasyon, se pa t yon neglijans, men pito li menm ki te prefere yon seremoni senp. Sa montre ke bèl aparans pa defini sans lavi ni grandè.

𝐒è𝐯𝐢 𝐦𝐨𝐮𝐧 𝐬𝐞 𝐜𝐡𝐞𝐦𝐞𝐧 𝐢𝐦ò𝐭𝐚𝐥𝐢𝐭𝐞

Pap la te toujou gen yon panse spesyal pou moun pòv, moun ki majinalize, ak moun yo bliye yo e lemond onore li pou sa. Yo pa p sonje li kòm "Pap la," men kòm yon sèvitè limanite.

𝐈𝐧𝐢𝐭𝐞 𝐤𝐫𝐞𝐲𝐞 𝐧𝐚𝐧 𝐈𝐦𝐢𝐥𝐢𝐭𝐞

Relijyon se pami sous divizyon nan mond lan. Pap Francois te chita pale ak tout moun nenpòt relijyon ou pratike. Se te premye Pap nan listwa ki vizite Irak, yon peyi ki konnen anpil gè, teworis, ak konfli relijye. Nan fineray li, lidè Islamik, Jidayis, Boudis, ak lòt relijyon te prezan. Se yon temwayaj travay li te fè pandan tout lavi li pou dyalòg ak lapè ant relijyon yo.

𝐋è 𝐰 𝐠𝐞𝐧 𝐦𝐨𝐝𝐞𝐬𝐭𝐢 𝐨𝐮 𝐠𝐞𝐧 𝐩𝐥𝐢𝐬 𝐞𝐧𝐩𝐚𝐤

Antèman modès Pap la pa diminye enfliyans li te genyen, okontrè li ogmante. Moun ki pa t konnen l nan vivan vin chèche konnen l lè l mouri, se tankou li vin pi popilè. Sa montre nan ki nivo imilite ak modesti pale fò pou yon lidè.

𝐑𝐞𝐤𝐨𝐧𝐞𝐬𝐚𝐧𝐬 𝐦𝐚𝐜𝐡𝐞 𝐚𝐤 𝐥𝐢𝐝è𝐜𝐡𝐢𝐩 𝐤𝐢 𝐬𝐞𝐧𝐩

Plis pase 200 mil moun asiste fineray Pap la nan plas Senpyè a. Moun yo pa t sispann kriye “Grazie, Francesco!” (Mèsi, François!). Sa montre kijan yon lavi enb atire lanmou ak rekonesans reyèl. Pap la te gate moun yo. Gen aksyon le te konn fè yo p ap janm bliye tankou lave ak bobo pye prizonye, anbrase malad yo, elt.

𝐘𝐨𝐧 𝐌𝐞𝐬𝐚𝐣 𝐏𝐨𝐮 𝐋𝐚𝐩è 𝐧𝐚𝐧 𝐲𝐨𝐧 𝐦𝐨𝐧𝐝 𝐤𝐢 𝐧𝐚𝐧 𝐆è

Plizyè lidè politik ki te nan kont chita pale nan feneray Pap la. Pami yo, Prezidan Zelensky ak Donald Trump ki te gen gwo dezakò dènyèman sou gè Ikrèn/Risi a. Nèg yo fè bèl dyalòg, e selon sa ki soti nan laprès, sa bay gwo espwa pou avni Ikrèn. Yon bagay Pap la te toujou swete.

𝐌𝐞𝐬𝐚𝐣 𝐒𝐨𝐥𝐢𝐝𝐚𝐫𝐢𝐭𝐞 𝐚𝐤 𝐣𝐢𝐬𝐭𝐢𝐬 𝐬𝐨𝐬𝐲𝐚𝐥

Pap la te toujou raple lidè politik yo “Nou pa lèdmi menm si nou gen fwontyè ki separe nou ak kwayans diferan, nou se frè paske mond lan se yon sèl”. Nan yon epòk kote anpil peyi gen kriz imigrasyon, inegalite ak konfli entèn, kote anpil lidè ap chèche pouvwa ak glwa pèsonèl yo, antèman Pap la se te yon envitasyon pou dirije ak senplisite ak konpasyon.

Si w pa t konn sa, Vatikan se yon peyi. Sa vle di yon Pap se pa sèlman yon lidè relijye, men se yon chèf Deta tou. Legliz Katolik gen anviwon 1,2 milya fidèl nan mond lan, kidonk, ou ka di Pap la se lidè k ap dirije plis moun nan. Men, li se lidè ki pi modès la.

Sa dwe enspire lidè legliz yo tou pou yo konprann legliz pa sèlman yon gwo bilding oswa enfliyans politik, men yon enstitisyon ki baze sou sèvis, imilite, ak konpasyon. Legliz la pa la sèlman pou prepare moun pou syèl, men pou pran swen sou tè a epi sèvi kominote yo.

Nan yon peyi tankou Ayiti, chanjma pa posib san legliz. Lidè legliz yo ka fè ministè yo tounen fòs pou transfòme kominote yo e pi enspire chanjman reyèl nan peyi a. Lè nou kite relijyon de kote, gen anpil bagay nou ka prann de lavi ak Antèman Pap François.